Sumardrykkurinn Hveitibjór

Best Food to Compliment Beer

Sífellt fleiri kjósa að drekka hveitibjóra sem svaladrykki á sumrin. Á meðan flestum sterkari og bragðmeiri bjórum hentar best hærra hitastig, til að fjölbreyttir bragð- og lyktartónar njóti sín, er hreinlega mælt með því að drekka ýmsar tegundir hveitibjóra vel kalda.

Orðið hveitibjór vísar í kornið sem notað er við bjórgerðina. Í fyrndinni var bjór bruggaður úr hverjum þeim sterkjugjafa sem völ var á: byggi, höfrum, hveiti, rúgi, hirsi og jafnvel maís eða baunum. Með tímanum þróuðust mál þó á þann veg að bygg varð uppistaðan í nær öllum bjór, enda byggkornið ódýr afurð sem auðvelt er að nota í bæði bjór og viský.

Hveitibjórar eru veigamesta undantekningin frá þessu, en í honum eru bæði bygg og hveiti – yfirleitt til helminga. Ekki geta allar tegundir bjórgers unnið jafn vel á hveitinu. Því er að jafnaði notast við ger sem gefur bjórnum auðkennandi bragð og lykt, með mildum tyggjó- og bananatónum. Til að þetta sérkennilega bragð fái að njóta sín er sjaldnast notað mikið af humlum í hveitibjóra, þótt á því séu reyndar áhugaverðar undantekningar.

Þar til fyrir um það bil hálfri öld voru hveitibjórar jaðarbjórtegund sem fáir drukku og framleiðslan bundin við tvö svæði: nokkur héruð í Belgíu annars vegar en nágrenni München í Bæjaralandi hins vegar. Um tíma leit út fyrir að bjórstíllinn myndi verða undir í samkeppninni og deyja út, en skyndilega varð eins og smekkur bjóráhugamanna breyttist og hveitibjórar fóru að falla í kramið á ný. Í dag er hveitibjór sá stíll sem mest er drukkið af í München.

Í raun má segja að hveitibjór skiptist í tvær undirgreinar. Annars vegar er það Weizenbier eða Weißbier í Bæjaralandi. Hann einkennist af bananakeimnum sem áður var nefndur og er helst drukkinn úr háum og ávölum glösum sem fanga hina miklu froðu. Þýski hveitibjórinn getur verið ljós eða dökkur (dunkel). Hann er ýmist síaður svo hann verði tær (kristallweizen) eða gerið og botnfallið fær að vera í flöskunni svo bjórinn verður skýjaður (hefeweizen). Erdinger er sennilega sá þýski hveitibjór sem Íslendingar þekkja best.

Hins vegar er um að ræða Wittbier frá Belgíu. Að hætti Belga er sá bjór kryddaður með ýmsum viðbótarefnum sem skila sér í bragði og lykt. Má þar nefna bæði kóríander og appelsínubörk. Hoegaarden er kunnasta dæmið um Wittbier.

Fleiri greinar

Byltingin frá Bandaríkjunum

Það tíðkaðist lengi hjá evrópskum bjóráhugamönnum að tala óvirðulega um bandarískan bjór. Flestir tengdu Bandaríkin við létta og nánast vatnskennda lagerbjóra sem oftar en ekki voru bruggaðir með maís eða hrísgrjónum til blands við byggið. Og vissulega eru slíkir bjórar enn þeir sem mest eru drukknir í landi hinna frjálsu. Bjórlandslagið í Band […]

Lesa meiraLesa meira

Smakkur og góðska

Færeyingar eru okkar bestu vinir og nágrannar, auk þess sem tungumál þeirra og kunnuglegur en um leið framandi ritháttur einstakra orða er sífelld uppspretta kátínu fyrir Íslendinga. Oft er fróðlegt að skoða færeyska sögu og bera saman við Íslandssöguna, þar sem aðstæður í löndunum tveimur eru um margt líkar en þróunin oft með allt öðrum hætti.  […]

Lesa meiraLesa meira

Íslenska brugghúsabyltingin

Íslendingar hafa rankað við sér. […]

Lesa meiraLesa meira